U3F1ZWV6ZTIyMjI5Mjc2MDUyX0FjdGl2YXRpb24yNTE4MjcwMjk0NzI=
recent
أخبار ساخنة

ابو عين حمرا - تحفيز ثانوية عامة (انت قدها)

 تحفيز ثانوية عامة 

قصة النهاردة لبطل كان في ثانوية عامة وقدر يتغلب علي الصعوبات اللي واجهته.


وهنا هسيب ليكم القصة مكتوبة من علي لسان صاحبها


القصة

بوست تحفيزى لبتوع الثانويه 💪 لتانى مرة عسي أن يبث فيكم الامل بفضل الله من جديد ⁦❤️
  1. البداية
مالكم محبطين ليه ؟ 💔
طب تسمحولى احكيلكم حاجه مختصرة عنى ؟
كنت اول اسبوع في دروس تالته ثانوى كنت في درس فيزياء وتليفونى رن ، كنسلت ، رن تانى وتالت ، رديت إلحق يا ياسين امك واختك !


جريت علي البيت وانا مش عارف انا بعمل ايه ولا ايه اللى حصل !

لقيت شارعنا مليان ناس وصويت ، وابويا وسط الناس مكسور بيعيط كأنه طفل يتيم وبيقولى الحق امك واختك في المستشفى العام يا ياسين !!


متخيلين ؟!
اختى وامى كانوا رايحين المدينه يشتروا حاجات للبيت .

لقيت البلد كلها بتجرى علي المستشفى ، وكان فيه اللى يقولى عملوا حادثه واللى يقولى هما كويسين واللى يقولى مكسورين ، روحت المستشفى وانا اقسم برب الجلاله وسطى محلول ومش دارى بنفسي ، هما فين ؟!

الدكتور خرج وقال!!!
للاسف الست الكبيره ماتت وبنتها في العنايه المركزه !
امى ماتت يا دكتور ؟
وبعدها بدقيقة خرجوا الممرضات قالوا للدكتور البنت ماتت !


متخيلين يا جماعه كمية انك ضهرك ينكسر في لحظه ، والله اسود يوم في حياتى لحد ما اموت ، ربنا ما يوقعكم في مصيبه زى دى ، اختى الوحيده وامى فى ذمة الله .


ما بقاليش حد في الدنيا غير ربنا وابويا !
كنت فقدت الامل في انى أعيش تانى والله ، والله كنت بفكر انتحر بدون مبالغة !
ابويا برغم كسرته وبرغم المر اللى كان فيه كان بيواسينى وبيصبرنى وكان دايما يقولى انت مؤمن وعارف ربنا ، انا يبنى عاوز اقولك كلمتين ، انا خلاص ما بقاليش في الدنيا غيرك ، وانا مش ضامن عمرى ، اعمل مستقبل لنفسك يبنى محدش هينفعك

انا كنت علمى علوم وكنت داخلها علشان عارف مستوايا لو ذاكرت اوى أخرى هجيب 85% بالكتير ، قولت انا هحول علمى رياضه وهذاكر وهحقق حلم امى الله يرحمها وادخل هندسه زى ابن خالتى ، امى كانت بتحبه اوى وكان نفسها ابقى زيه ، المهم اقسم بالله انا ما كنت بطيق الرياضه ، بس ذاكرت وتعبت كنت بحفظ وبفهم وبذاكر وبراجع كنت بسمع فيديوهات شرح كنت مركز علي حاجه واحده بس هى انى احقق حلمي امى ، والله العظيم مرار ما بعده مرار وانا بذاكر في ظل تعب نفسي شديد وتفكير يعصر الدماغ ، غير انى كنت قايم بشغل البيت وشغل السوبر ماركت ، ابن خالتى ما سابنيش لحظه.

ناس وقفت معايا وسندتنى ، ابويا كان دائما في ضهرى ، ناس كتير كانت بتحبطنى بطرق غير مباشرة ، واقرب الناس ليا كانوا بيتكلموا في ضهرى انى مش هعمل حاجه ، كان كل دعائى لربنا أنه ما يشمتش فينا حاقد ويحققلى حلم الحياة . كنت دائما بتعب وانا بذاكر والله تعب الدماغ متعب اوووى بس كنت بدوس علي نفسي علشان ابويا وعلشان ما اضيعش وقت ، خدت بكل الأسباب ، وكنت دائما متأكد أن ربنا مش هيضيع تعبي.

اختبارات كتير عدت عليا عرفت ناس كتير اووى مش تمام وناس تسند جدا ، كنت صابح امتحن عربي ابويا فضل سهران جنبي لحد الصبح وجيت من الامتحان لقيته مستنينى ، وبفضل الله وبمجهودى جبت 95,4 % ، يوم النتيجه حسيته فعلا زى يوم العيد بعد صيام شهر رمضان ، ربنا مش بينسي حد ولا بيضيع تعب حد ، حسيت ابويا رجع شباب من تانى وراح المقابر في نفس الوقت وخد التليفون معاه وكان بيقرأ الدرجات علي مقابر امى ، ويقولها انتى خلفتى راجل يا ام ياسين ، اخوكى راجل يا خديجه
وحشتونا قوى ، وفضل يبكى من فرحته بيا وزعله علي الفقد.

الخلاصة

فعلا
  • من جد وجد والله
  • خدوا بالاسباب
  • اعملوا اللى عليكم
  • انتوا جواكم حد قوى قوى والله ، عايز بس اللى يفوقه ، لا يكلف الله نفسا إلا وسعها
  • سيبكم من الفيس والله انا كل شوية اقفل الاكونت واعمل واحد جديد من الملل حاجه بقت ممله ،
  • اتعبوا يا جماعه اتعب ف حياتك 

ولو النتيجه بتاعتك ما عجبتكش عادى متزعلش اهم حاجه اعمل اللى عليك وارضي ربك.

اتحركوا ما تقفوش ما تخلوش حد يحبطكم ، ما تستسلموش للظروف ، حاولوا تكونوا سند لبعض لاننا كلنا بنحتاج لذقة او دفعه .

والحمد لله انا في تانيه هندسة حلوان حاليا
والله كلكم اقوى مما تتخيلوا بكتير ، فوق نفسك بنفسك ، وربنا مش بيحرم حد ⁦❤️
#انتوا_تقدروا
#انتوا_قدها
#الله_كريم
#عافر
#هتوصل


ليست هناك تعليقات
إرسال تعليق

إرسال تعليق

الاسمبريد إلكترونيرسالة